خبر تناقلته الصحف و مواقع الإنترنت أصابنى بالدهشة. و الخبر مش غريب، لكن هوه فى دولة عربية "شقيقة"حاجة كده فى نفس مصاف المستحيلات الثلاث، يعنى ممكن تكون المستحيلة الرابعة، الخامسة، فوق المستحيلة. المهم، الخبر إن رئيس دولة موريتانيا "سيدى محمد ولد الشيخ عبد الله" المنتخب إنتخابا حرًا، و خد بالك من المنتخب إنتخابا حراً دى، فى تجربة فريدة من نوعها عربيا ، قرر أن يتنازل عن ربع مرتبه للمساهمة فى تقليل عجز الموازنة فى موريتانيا و طالب وزراءه بالمثل، و الوزراء إستجابوا
أنا اللى إتربيت عليه فى مصر، إن فلوس البلد دى مال سايب، يعنى اللى يقدر يهبش منها يهبش و إنت و اللى تقدر عليه هبشة إيدك. و كمان يعنى إيه رئيس جمهورية يتنازل عن ربع مرتبه أمال ح ياكل و يشرب إزاى؟ ناقص كمان يقولولنا إنه يبطل يهبش من فلوس البلد، و يبطل سمسرة سلاح، و عيالة يبقوا مواطنين عاديين، مش هما و صحابهم نازلين هبش فى البلد و لا أكنها عزبة الحاج أبو جمال
طول عمرنا نسمع عن سياسة تقليل المصروفات لسد عجز الموازنة، و مشفتش وزير إتنازل حتى عن العربية اللى جايبنهالوا فى الوزارة، مع إنى معتقدش يعنى إن فيه وزير جه مصر ما عندهوش عربية، طبعا انا مابتكلمش عن وزراء الفكر الجديد اللى هما أصلا أغنى أغنياء مصر قبل ما يبقوا وزراء، ده يا جماعة لو نوارة بقت وزيرة، هيكون معاها عربية و قسطها أربعمية جنية فى الشهر، يعنى مش ح تحتاج عربية من الوزارة
ما شوفتش وزير بيحاول يقلل عدد المستشارين فى وزارته، علشان يقلل عجز الموازنة، مع إن فيه وزارات فيها يجي تمنتاشر مستشار ، و مرتباتهم فى المتوسط بالآلاف، يعنى مرتب كل و احد فيهم ممكن يشغل كام عاطل؟ طيب هل فعلا الوزارات ولا الهيئات الحكومية دى فى حاجة للمستشارين كلهم؟
و....و......و......و....إلخ
يا موريتانيا، بصراحة إنت بقيتى "هم" تقيل قوى علينا و على الحكام العرب
و لسه شكلنا ياما ح نشوف منك
الصورة من وكالة الأنباء الموريتانية*