خبر تناقلته الصحف و مواقع الإنترنت أصابنى بالدهشة. و الخبر مش غريب، لكن هوه فى دولة عربية "شقيقة"حاجة كده فى نفس مصاف المستحيلات الثلاث، يعنى ممكن تكون المستحيلة الرابعة، الخامسة، فوق المستحيلة. المهم، الخبر إن رئيس دولة موريتانيا "سيدى محمد ولد الشيخ عبد الله" المنتخب إنتخابا حرًا، و خد بالك من المنتخب إنتخابا حراً دى، فى تجربة فريدة من نوعها عربيا ، قرر أن يتنازل عن ربع مرتبه للمساهمة فى تقليل عجز الموازنة فى موريتانيا و طالب وزراءه بالمثل، و الوزراء إستجابوا
أنا اللى إتربيت عليه فى مصر، إن فلوس البلد دى مال سايب، يعنى اللى يقدر يهبش منها يهبش و إنت و اللى تقدر عليه هبشة إيدك. و كمان يعنى إيه رئيس جمهورية يتنازل عن ربع مرتبه أمال ح ياكل و يشرب إزاى؟ ناقص كمان يقولولنا إنه يبطل يهبش من فلوس البلد، و يبطل سمسرة سلاح، و عيالة يبقوا مواطنين عاديين، مش هما و صحابهم نازلين هبش فى البلد و لا أكنها عزبة الحاج أبو جمال
طول عمرنا نسمع عن سياسة تقليل المصروفات لسد عجز الموازنة، و مشفتش وزير إتنازل حتى عن العربية اللى جايبنهالوا فى الوزارة، مع إنى معتقدش يعنى إن فيه وزير جه مصر ما عندهوش عربية، طبعا انا مابتكلمش عن وزراء الفكر الجديد اللى هما أصلا أغنى أغنياء مصر قبل ما يبقوا وزراء، ده يا جماعة لو نوارة بقت وزيرة، هيكون معاها عربية و قسطها أربعمية جنية فى الشهر، يعنى مش ح تحتاج عربية من الوزارة
ما شوفتش وزير بيحاول يقلل عدد المستشارين فى وزارته، علشان يقلل عجز الموازنة، مع إن فيه وزارات فيها يجي تمنتاشر مستشار ، و مرتباتهم فى المتوسط بالآلاف، يعنى مرتب كل و احد فيهم ممكن يشغل كام عاطل؟ طيب هل فعلا الوزارات ولا الهيئات الحكومية دى فى حاجة للمستشارين كلهم؟
و....و......و......و....إلخ
يا موريتانيا، بصراحة إنت بقيتى "هم" تقيل قوى علينا و على الحكام العرب
و لسه شكلنا ياما ح نشوف منك
الصورة من وكالة الأنباء الموريتانية*
.jpg)
33 comments:
جملة ياموريتانيا انتى بقيتى همل تقيل اوى علينا ولسه ياما نشوف منك
جملة فى الجون فعلا
تلاقى كل واحد من اياهم ماوراهوش غيرها دلوقتى
احييك على البوست الجميل ده
موريتانيا يجب ان تطرد من جامعة الدول العربيه ...لانها اخلت بنظام الحكام العرب الدكتاتوري
تحياتي
هههههههههه
انا اضم صوتي لصوت ابن ناصر
قريت الخبر ومعرفتش اضحك ولا اعيط ولا احيي موريتانيا
اقولك تعالي نقدم طلب هجرة لموريتانيا
بس انا خايفة احسن يطردونا
نياهاااااااا
بليفر
ادعوك للمشاركة في استفتاء
اكثر 10 مدونات تاثيرا في قرائها
عل مدونتك منهم
اليك الرابط
http://www.6ef.blogspot.com/
عارف فكرتني من فترة كنت بقول لو لم أكن مصرية لوددت ان أكون فنزوالاية أما رئيس فنزويلا سحب سفيرهم من اسرائيل...فاكر؟؟
بحب السيما
موريتانيا دلوقتى زنقة الحكومات العربية فى خانة اليك
مرحبا بك دائما ضيفا عزيزا على المدونة و شكرا يافندم على الكلام الجامد ده
إبن ناصر
فكرتنى ب"حمدى قنديل"فى البرنامج بتاعة وقت إنتخابات الرئاسة فى موريتانيا، طالب الدول العربية إنها تطرد موريتانيا من الجامعة لأنها ما تستحقش تكون دولة عربية
:)
انا خايف بس للعدوى ترجع تانى عندهم، أصل برضة ما ننساش، فى النهاية هما عرب
Zenzana
تصدقى إن ممكن بعد كده تلاقى الفيزا بتاعة موريتانيا بيطلوبلها حساب فى البنك، و دعوة و الحاجات دى!!
يعنى إحنا بعد شوية مش حنلاقى غير أدغال أفريقيا ممكن ترضى بينا
:S
تفتكرى يا زنزانة ح نعيش لغاية اليوم اللى نشوف فيه وزير فى مصر شريف؟
(مش حتكلم انا عن اللى أكبر من الوزير علشان لسه الفساد موصلش للدرجة دى فى مصر)
:))))
منة الله
علم يافندم و جارى التنفيذ
Mariam
هوه اللى انا واخد بالى منه، إن دلوقتى ناس كتير تتمنى تكون أى حاجة، بس مش مصرى
أنا عن نفسى، نفسى اكون لبنانى، موريتانى، فنزويلى، صينى ....
كفاية كده علشان جالى إكتئاب لما إفتكرت إن القائمة طويلة قوى
:S
يا أخي يلعن ابو الدول الي هتقلب علينا عيشنا دي...احنا نعمل زي صدام ما عمل في العراق بعد عاصفة الصحراء...عارف صدام عمل فيهم ايه..منع عنهم الدش والتلفزيون..و الرديو وفهمهم انهم غلبوا الأمريكان العلوج والجوع الفقر الي هما فيه ده مجرد مرحلة انتقالية...انا من رايي اننا نعمل كده احنا كمان احنا ناقصين قرف..مش كفاية المناظر الي الواحد بيشوفها في الافلام بتاعة الأجنبيين...قال ايه عندهم شوارع نظيفة و بلدهم مفيهاش .( تخيل) سحابة سودا..وكمان بيقفوا عند الإختراع المتخلف الي بيعطل الدنيا ده الي اسمة مش عارف ابصر ايه كده أشارة..على سمير غانم في المتزوجون...جتكوا البلاوي و انتو بتاكلوا 30 بيضة في اليوم
عارف أنا هعمل زي محمد شرف في فيلم ظرف طارق أما حد يسألني انت مين و لا منين هقول : أنا رئيسة جمهورية نفسي ... و فكك بقى من الباقي
SokootHanSawat
فكرتينى بحاجة حصلتلى، كنت فى السويد بزور ناس صحابى، و هناك فى المدينة اللى هما عايشين فيها، ماكنش فيه إشارات مرور فى معظم التقاطعات، فكنت بقف و أبص لو فيه عربية ولا لأ و بعدين اعدى، و لو فيه عربية، كنت بعمل فيها عم المصرى المتحضر و أعقد اتعازم انا و العربية مين اللى يعدى التانى الاول، لغاية ما صحابى أقلولى، إيه اللى غنت بتعمله ده، إنت اصلا من حقك تعدى، و هوه و اقف علشان حضرتك تعدى، علشان المشاة ليهم الاولوية!!!
شوفى الإحترام!!
تخيلى بقى إشارة فى مصر ، مش ح قول من غير عسكرى مرور، خليها بعسكرى مرور بس من غير ورقة و قلم، حيبقى شكلها إيه؟
:)))
تحياتى لكى و كملى صويت
Mariam
و الله حل برضه، طيب تفتكرى، أخليها جمهورية و لا إمارة و لا كفاية عليها كلمة دولة و خلاص؟
يساري إز باك أجين
الهارد اتصلَّح و الحمد لله
و لم اصب باي إصابات او تحرشات كما تروج مُخَرِفت المعادي
عشان إحنا رداله و بنجف و جفة رداله
و جاري العمل على إنشاء منظمه حقوقيه ذكوريه تتطالب بحقوق الذكور المنهوبه
اما بالنسبه لحرقة الدم بتاع الراجل بتاع موريتانيا فا و العياذ بالله دا شاكلوا ممسوس او عليه جوستس
او ربنا جايبه عشان يحنِّسنا و يزيد من بلوانا
يارب ياتخده
ياتاخد ال 79 مليون و يصحى ميلاقيش حد يحكمه
صباح الفل على العزيز بليفر
يسارى مصرى
ويلكم باك يا عم
:)
إنت مش ناوى تجيبها البر، يابنى كل مرة تجيبلنا الكلام.
رنا يستر عليك و علينا، شوف يا عم العداد اللى إنت لعبت فيه ده دلوقتى، إلحق إعدله
سيبك إنت، المهم الإمتحانات عاملة معاك إيه؟
تحياتى لك يا عزيزى
طبعا لازم يجي التغير وهو جه في مورتنيا قبل اي دوله عربيه افرقيه تحياتي ليك علي كلامك الجميل ده
ارجو منك زيارتي دايما وانا لازم ازورك علطول لانك كاتب رائع
خبر عاااااااااااااااجل
قررت جامعه الدول العربيه اسقاط عضويه موريتانيا و اعتبارها دوله مارقه خارجه عن دستور الجامعه و شكرا
بليفر من رأي خليها دولة و خلاص, و بخصوص يساري هو بس يجيلي منطقتي :):)
Fares
كرا يافندم على الكلام اللى انا مستحقوش ده.
على فكرة انا مش كاتب و لا مدون ولا اى حاجة، أنا بنى آدم عادى بفكر بس بصوت عالى.
أنا بتابع مدونتك من لفترة لفترة، بس أنا مبعلقش كتير، بحب أتابع أكتر
شكرا للزيارة ، و سعيد بزيارتك دايما
Micheal
يستاهلوا اللى يحصلهم، هما جبوه لنفسهم
:)))
Mariam
يا فندم اللى تؤمرى بيه حضرتك يتنفذ، إحنا خايفين على صاحبنا برضة
:))
أحب أبشرك
أن الدول العربية
حتتحد ولأول مرة فى تاريخها الطويل
ضد
موريتانيا
كى لا تنتقل تلك العدوى المدمرة منها الى بقية الدول العربية
وعنيهم تفتح بقا ومش حنخلص من الشعوب ولا طلباتها
شهروزة
إنتى بتقولى فيها، طيب تراهنى إنهم ح يعملوا كده؟
هيه بس ممكن ربنا يسترها عليها علشان هيه بعيد و ملهاش أهمية إستراتيجية زى بلاد تانية، إنما دى لو كانت فى النص، كان زمان بقى عندهم حرب اهلية دلوقتى
كان ياماكان
قبل ما يكون هناك كرسي حكم وسلطان
وقبل ما يكون في سيف وسجان
وقبل ما يكون في واحد ظالم وواحد جبان
كان في وطن
وكان في نهر كبير
كل صباح تخرج الحوريات
وتلعب على الشط
وفي يوم
نزل من على الجبل عفريت
وفي ايده كرسي دهب
أعد عليه ونسى نفسه
ولما بص يمينه
وبص شماله
مالقاش غير ضله
والشط من غير نهر
ولا حوريات
ومفيش غير العفريت وضله
أبناء مصر..بنحب, هنقدر, هنغير
http://abna2masr.blogspot.com
إنتصار عبد المنعم
المعنى وصل، و بجد بحييكى
و بحييكى على المدونة بتاعتك كمان، من المدونات اللى إستمعت بيها فعلا
تحياتى لكى
Mariam
علم يافندم و جارى التنفيذ
:)
هههههههههههههه
بجد ياليتنا كنا كلنا من موربيتانيا
بجد عندك حق الواحد عايز يغير الجنسية لموريتانية والله الرئيس بتعهم ده شكله ييجى منه مش زى مخيم الحرامية اللى عندنا
El-Gazaly
شفت بقى
و سلملى على حضارة السبع تلاف سنة
Hend
أنا ابتديت أشك إن الموريتانيين عرب أصلا، اكيد هما مخلطين على عرق تانى
ياسلام بالفعل انبهار
والله يا ادهم يا حبيبي انا غلبت من موريتنيا ده بجد بقت حاجه تغيظ
ده يا راجل انا كتبت عنها اكتر من 6 بوستات
واخر ما زهقت رفعت العلم الموريتاني علي مدونتي وطلبت اللجوء السياسي لها
وحضرت ورقي
بس المشكلة الوحيدة
هي فين سفارتهم في مصر ؟
لو حد عرف يرد عليا
-----------------------------
صحيح يا عم ادهم يا ندل
كنت من كام يوم في خروجه كانت نقصاك
التفاصيل علي مدونتي بعد كام يوم
وعلي فكرة وحشتني قوي خليني اشوفك
ومتخفش مش هغرمك تمن تذكرة السينما الي كنا المفروض ندخلها من شهر ده
انا عايز اشوفك بس
انا اسف بس النص التاني من التعليق جه عندك غلط
انت ليك النص الاول بس
أحمد عبد الفتاح
مين أدهم ده؟
وهى اية موريتانيا دى
حاجة حلوة ولا حاجة وحشة
وعلى العموم الف شكر
يعطيك العافية
Post a Comment