Saturday, September 29, 2007

أحبك حبين


أحبك حبين : حب الهوى... وحـب لأنك أهـل لِـذاكَ

فأما الذي هو حب الهوى...فشغلي بذكرك عمّن سواك

وأما الذي أنت أهلٌ له...فكشفك للحجب حتى أراك

فلا الحمد في ذا ولا ذاك لي...ولكن لك الحمدُ في ذا وذاك

ولما علمت بأن قلبي فارغ ممن سواك .. ملأته بهواك

وملأت كلّي منك حتى لم أدع مني مكاناً خالياً لسواك

فالقلب فيه هيامه وغرامه والنطق لا ينفعك عن ذكراك

والطرف حيث أجيله متلفتاً في كل شيء يجتلي معناك

والسمع لا يصغي إلى متكلم إلا إذا ما حدّثوا بحلاك


رابعة العدوية
* Photo by Adam Betts

Tuesday, September 11, 2007

كل سنة و كل مصرى بخير




كل سنة و كل مصرى ، بيحب بلده و بيحب ناس بلده بجد بخير

Monday, July 02, 2007

صباح الخير يا بلد


ساعات أقوم الصبح قلبى حزين
أطل بره الباب ياخدنى الحنين
اللى لقيته ضاع واللى اشتريته انباع
واللى قابلته راح وفات الأنين
وارجع واقول
وارجع واقول
لسه الطيور بتفنّ
والنحلايات بتطنّ
والطفل ضحكه يرنّ
مع انّ مش كل البشر فرحانين

صلاح جاهين من فيلم عودة الإبن الضال


* Picture of "Person at the Window" by Salvador Dali

Saturday, June 09, 2007

يا ليتنى كنت موريتانياً


خبر تناقلته الصحف و مواقع الإنترنت أصابنى بالدهشة. و الخبر مش غريب، لكن هوه فى دولة عربية "شقيقة"حاجة كده فى نفس مصاف المستحيلات الثلاث، يعنى ممكن تكون المستحيلة الرابعة، الخامسة، فوق المستحيلة. المهم، الخبر إن رئيس دولة موريتانيا "سيدى محمد ولد الشيخ عبد الله" المنتخب إنتخابا حرًا، و خد بالك من المنتخب إنتخابا حراً دى، فى تجربة فريدة من نوعها عربيا ، قرر أن يتنازل عن ربع مرتبه للمساهمة فى تقليل عجز الموازنة فى موريتانيا و طالب وزراءه بالمثل، و الوزراء إستجابوا


أنا اللى إتربيت عليه فى مصر، إن فلوس البلد دى مال سايب، يعنى اللى يقدر يهبش منها يهبش و إنت و اللى تقدر عليه هبشة إيدك. و كمان يعنى إيه رئيس جمهورية يتنازل عن ربع مرتبه أمال ح ياكل و يشرب إزاى؟ ناقص كمان يقولولنا إنه يبطل يهبش من فلوس البلد، و يبطل سمسرة سلاح، و عيالة يبقوا مواطنين عاديين، مش هما و صحابهم نازلين هبش فى البلد و لا أكنها عزبة الحاج أبو جمال


طول عمرنا نسمع عن سياسة تقليل المصروفات لسد عجز الموازنة، و مشفتش وزير إتنازل حتى عن العربية اللى جايبنهالوا فى الوزارة، مع إنى معتقدش يعنى إن فيه وزير جه مصر ما عندهوش عربية، طبعا انا مابتكلمش عن وزراء الفكر الجديد اللى هما أصلا أغنى أغنياء مصر قبل ما يبقوا وزراء، ده يا جماعة لو نوارة بقت وزيرة، هيكون معاها عربية و قسطها أربعمية جنية فى الشهر، يعنى مش ح تحتاج عربية من الوزارة


ما شوفتش وزير بيحاول يقلل عدد المستشارين فى وزارته، علشان يقلل عجز الموازنة، مع إن فيه وزارات فيها يجي تمنتاشر مستشار ، و مرتباتهم فى المتوسط بالآلاف، يعنى مرتب كل و احد فيهم ممكن يشغل كام عاطل؟ طيب هل فعلا الوزارات ولا الهيئات الحكومية دى فى حاجة للمستشارين كلهم؟


و....و......و......و....إلخ


يا موريتانيا، بصراحة إنت بقيتى "هم" تقيل قوى علينا و على الحكام العرب
و لسه شكلنا ياما ح نشوف منك



الصورة من وكالة الأنباء الموريتانية*

Tuesday, June 05, 2007

ملهمة آدم فى الأرض

فى تدوينة ل سبيلز
عن معاناة هذا الكائن الضعيف المسمى بالمرأة، من سوء معاملة هذا الكائن الوحش المسمى بالرجل، و كانت تدوينة بعنوان مخرجة آدم من الجنة ، لقيت نفسى فى وضع المدافع عن أبناء جنسى و محاولا النأى بهم عن تلك الإتهامات الباطلة

فيا كل إمرأة،
المرأة بالنسبة للرجل هى أمه، أخته، حبيبته، زوجته.
المرأة بالنسبة للرجل هى شريكته فى حياته
المرأة بالنسبة للرجل، هى الجزء الجميل فى الكون ده اللى بيأنس إليه

زى ما الرجل متهم بسوء معاملة المرأة، فالرجل هو الوحيد الذى يرى أجمل و أروع ما فى المرأة
دائما المرأة و ستبقى ، هى ملهمة الرجل





*Video provided by "eggman91", published on YouTube.com

Sunday, May 27, 2007

عبد الوهاب المسيرى


لم ألتقيه يوما، و لكن لطالما تمنيت ان أكون من تلاميذة
لم تسعفنى الظروف أن أحضر صالونة الثقافى، و لكنى لم أستطع ألا أقرأ كتبه
لست عضوا فى حركة كفاية، و لكن الحركة يكفيها فخرا ان منسقها العام، هو الدكتور عبد الوهاب المسيرى



تخلت الدولة عنه و تركته و حيدا مع المرض، و لكنه ليس وحيدا، لأن الآلاف من تلاميذة لن يتركوه وحيدا
فلنفكر سويا "ماذا يمكن أن نفعل لرجل بتلك القيمة ، ليس لمساعدته فى محنته، و لكن لنجعله يعلم أن تلاميذة يشعرون تجاهه على الاقل بالإمتنان"



الحوار جارى حول ماذا يمكن ان نفعل تجاهه على مدونة زنزانة
لنفكر سويا ماذا يمكن ان نفعل

Saturday, May 26, 2007

لحظة الحقيقة


تشغلنى منذ فترة تلك اللحظة
لحظة فراق الحياة، لحظة الموت
لحظة خروج الروح من الجسد
هل هى حقا مؤلمة؟
ترى، فيما يفكر الإنسان فى تلك اللحظة؟ فى ألمها أم فى أن نهايته قد حانت؟

أليست تلك هى لحظة "الحقيقة"،حيث يتجلّى للإنسان معنى الحياة
حيث تتكشف أمامه صدقها و أكاذيبها
أم ترى أن تلك اللحظة، ليست لحظة الحقيقة المنتظرة؟

تلك اللحظة، حيث تسقط كل الأقنعة اللتى تملا الحياة
حي تسقط كل النظريات و الأيدولوجيات
و تظهر فقط حقيقة الحياة
أم ترى أن للحياة عدة حقائق، ليست واحدة فقط؟

ترى لما يكره الإنسان لحظة الموت؟
أليست رائعة لحظة تتكشف له فيها حقائق العالم حوله
أم أن الإنسان يخاف تلك اللحظة، لأنه يخاف إكتشاف الحقيقة؟




*photo by Deborah Littmore

Sunday, May 20, 2007

مات الحاج، عاش إبن الحاج

مات الحاج






عاش إبن الحاج

*الصور ملطوشة من العزبة *

Sunday, May 13, 2007

للعزيزة "راندا" زنزانة

انا كنت ناوى الحقيقة اكتب تدوينة فى منتهى الكآبة، و قبل ماكتبها فى الجولة المعتادة على التدوينات الصديقة، لقيت "زنزانة" عندها نوبة تنفيض،فالحقيقة التراب عمانى من كتر التنفيض اللى عندها.
لذلك، قررت إهداء تلك الأغنية ل"راندا"الشهيرة ب"زنزانة"أهوه حاجة تسليها و هيه منفضة فتخلص تنفيض بسرعة
:)
و مش مشكلة بقى، التدوينة الكئيبة تستنى شوية.

Monday, April 16, 2007

أول القصيدة


قالوا فى المثل "اول القصيدة....إيه؟"أيوه هو ده أستغفر الله العظيم، أنا بس خايف يكون الموضوع أكبر من قصيدة، ديوان شعر مثلا...ملحمه، يعنى ربنا يستر.


أول القصيدة إنى قريت فى المصرى اليوم خبر صغير كده. الخبر بيقول إن سواق تاكسى وقفوه فى كمين ، و طلبوا منه الرخص، المهم الموضوع تطور كلمه من هنا كلمه من هناك، حظابط قام ضربه و طبعا معاه البلطجيه بتوع أى ظابط اللى هما أمين الشرطه و العسكرى.
المهم بقى إن الاخ الظابط قال للراجل إيه؟ حسب ما ذكر فى المصرى اليوم، الظابط قالوه"إنت عارف إن فيه قانون دلوقتي اسمه قانون الإرهاب؟ وحياة أمك أخليك إرهابي بجرة قلم يا ابن الـ....."
حظابط بينفذ القانون قبل ما يكون فيه قانون، أمال لما يبقى فيه قانون هيعملوا إيه؟


أكتر حاجه إستفزتنى بقى إن ده أصلا كله حصل علشان السواق المسكين امين الشرطه طلب منه يعتذر للظابط و هو رفض علشان هو معملش حاجه غلط مما اثار غيظ الظابط، راجل عنده كبرياء يعنى. إنما إزاى يعنى فيكى واحد يا مصر يبقى عنده كبرياء، ما هو لازم كلنا نعتذر لحظابط علشان قلبه يرتاح و يحس إنه عمل اللى عليه.
و بعدين ده أصلا ظابط مرور، يعنى إيه علاقته بالإرهاب؟


طيب لما الظباط بقى مستنيين القانون قوى كده و هيخلوا كل الناس إرهابيين، يبقى انا عندى إقتراح إنهم يسموا القانون الجديد "قانون تحويل الشعب كله لإرهابيين" بدل من "قانون مكافحة الإرهاب" ده، أهو على الأقل يبقى الواحد فاهم اللى بيحصل.

و لسه ياما هنشوف، مش أنا قلت ده "أول القصيده" بس، مستنيين بقى بقيت القصيدة.


*photo from International Hat collection

Thursday, April 12, 2007

العوده للقاهرة

رجعت تانى لزحمة القاهره، وبلاده سواقين التاكسى و الميكروباص
و رجعت تانى للكمبيوتر و للبلوج
و طبعا كفتره إنتقاليه، قلت أعدى كده على المدونين اللى انا بحب أتابعهم (علشان أدخل فى الجو تانى يعنى)

عديت على نواره ، إنبسطت قوى لقيت بوست مفعم بالرومانسيه عن حبيبتى "فيروز"، إنشكحت و قلت الحمد لله شكل الجو فى مصر مشرق. بس لقيت بقى فيه كام بوست و أنا غايب كتبتهم يعنى بصراحه فضلت إنى مقرهمش علشان مضيعش الشعور الجميل اللى كان جوايا بسبب البوست بتاع فيروز.

عديت بعدها علىzsinfulangel،
لقيت بوست ، عايزه الناس يغنوا "لا و النبى يا عبده"، هو انا مفهمتش البوست بس عجبتنى الأغنيه :)

عديت بعد كده على مدونة adagio for spellz
عجبتنى قوى فى خصوصيتها الشديده و في إختصارها رغم شعورى إنى قمت برحله كبيره قوى داخل شخصيتها. هو أنا بس بقالى زمان مكسوف أسألها هو يعنى أسمها معناه إيه؟معلش الجهل وحش ياخوانا.

عديت بعد كده علي مايكل, لقيت الجزء التانى اللى كنت منتظره من مناقشته لفكرة نظرية المؤامره. أكتر حاجه بتعجبنى فى مايكل هو إحساسى بمصريته الشديده فى الكتابه و أسلوبه بسيط, بس أنا دايما بحس فى كل بوست بيكتبه إنه عنده أفكار كتير مش قادر يحطها كلها فى بوست، يعنى الراجل عنده إستعداد أنه يكتب كتاب مش بوست

لسه المود زى ما هوه، قلت أعدى بقى زنزانة, لقيت أخبار اللاجئين السودانيين اللى إعتقلوهم. بس بقى و إبتدى بقى الإحساس بالنكد بقى و حسيت إن الدنيا بترحب بيا تانى بعد الأجازه. مش حقدر أوصفلكم قد إيه إحساسى بالمراره، يمكن مش على اللى بيحصلهم على قد احساسى بالمراره إنى واحد من الشعب اللى بيعمل فيهم كده. منك لله يا زنزانة

عديت بعدها على إبن بهيه، لقيت قصيده لعمنا نجم عن "البتاع"، و خبر صغير شدنى عن صحة رئيسنا الميمون. اللى أنا بجد عايز أعرفه، هو فعلا الخبر ده صحيح؟على العموم أهوه ماشى مع مود النكد و الخوف من اللى ممكن يحصل فى البلد بكره.

عديت بعدها على إبن ناصر,
لقيت بوست هايل بالصور عن العراق اليوم. و اللهى الخوف من بكره لا يجى يوم فعلا و نلاقى فى الصور دى ميدان التحرير و رمسيس.
المهم إن البوست فضل ماشى على خط المود بتاع الخوف من بكرة.

بصراحه قلت آخد هدنه لأن الجرعه كانت كبيره عليا، بس رجعتنى تانى للجو المحيط اللى هوه الحقيقه مليان تفاؤل و امل، فقلت من كتر التفاؤل و الأمل أرجع بقى لحياتى تانى علشان الحقلى شوية أمل.

Saturday, March 31, 2007

أجازه قصيره




إبقوا معنا...........سنعود بعد الفاصل


جايلك يـــــــــــــــــا بــــحــــــــــر!!!!!!ـ

لسه بحلم ببكره


التدوينه دى إهداء للمواطن المصرى مينا زكرى -المدون الحاج جرجس سابق



طبعا مش حقدر أوصف كمية الإحباط اللى انا فيه من اللى حصل الفتره اللى فاتت، من تمرير تعديلات دستوريه أقل ما يقال عنها إنها تعديلات مهلبيه، اى حاجه فى اى حاجه.

أحبطت من إدراكى اكتر و اكتر لغباء الناس اللى عماله تتحكم فى مصايرنا، انا مشوفتش ناس عندهم قصر نظر سياسي للدرجه دى، يعنى دوله مش محتاجين نضاره، دوله محتاجين تليسكوب علشان يقدروا يشوفوا كويس أبعد من تحت رجليهم.


أنا ابتديت احس إن الناس دى عايزانا نفقد الأمل، عايزين يوصلولنا الإحساس إن مفيش فايده
عايزين يا إما تبقى الناس ملهاش دعوه بأى حاجه و مسلمالهم دقنها، و اللى كان بيحلم بأى تغيير، عايزين يكسروه من جوه.
لكن إيه العمل؟ ماهو الواحد يا إما يرضى بالأمر الواقع ده، يا إما يفضل يعافر.


طب عنداً فيهم بقى انا قررت إنى ميأسش، و قررت إنى حفضل أعافر، و قررت إنى حفضل أحلم ببكره، و اللى مش عاجبه يخبط دماغه فى الحيط، أصلى انا فى الأصل صعيدى و دماغى لما بتقفل، أجارك الله.


أيوه، أنا لسه بحلم ببكره..........


كلمه أخيره للأخ مينا زكرى(المدون الحاج جرجس سابقا)، مصر ليست وطنا نعيش فيه، مصر وطنا يعيش فينا.
مش لازم تبقى مدون، و مش لازم تطلع مظاهره علشان تبقى مناضل، إنت بس فكر فى مصر فى كل حاجه تعملها و إفتكر كويس إنك بتعمله علشانها و كده يبقى فعلا بتناضل


*الصوره لمينا زكرى من -مدونة كفايه...حرام- للمدون الحاج جرجس

Wednesday, March 28, 2007

البقاء لله

البقاء لله
توفيت إلى رحمة الله المرحومه/مصر (أم الدنيا) الشهيره ببهيه
و لا عزاء للمواطنين

Tuesday, March 27, 2007

ساح يا بداح


أنا من المعجبين ب"محمد منير" قوى. يمكن علشان انا وعيت على الدنيا لقيت إخواتى الكبار(أصلى انا أعيل واحد فى الجيل بتاعى) و الشباب فى العيله بيحبو يسمعوه و كانوا يعنى متابعين أخباره لدرجة إنى فاكر إنهم كانوا بيناقشوا الألبومات الجديده بتاعته قبل ما تنزل، و يتابعوا أخبارها. يمكن يكون علشان هو من الصعيد و أنا برده أصلا من الصعيد. المهم علاقتى بمنير إبتدت من أول ما وعيت يعنى إيه أغانى.

و كبرت و فضل منير بالنسبه ليا زى ما هو، مطربى المفضل. كنت دايما بحب أغانيه، بس زى كل الناس، كنت بحب الموسيقى بتاعته أكتر ، و يمكن بحب شوية أغانى علشان كلماتها. لغاية ما دخلت الجامعه، و عن طريق بعض الأصدقاء بدأت اتعرف على الوجه الآخر لأغانى منير. الأغانى اللى مليانه رموز و حب للوطن، اللى مليانه مشاعر و أفكار. من ساعتها و بعد ما إكتشفت الوجه الآخر للأغانى دى، و انا إكتشفت إنى بقيت مدمن لأغانى منير، و خصوصا القديم منها.

واحده من الأغانى اللى كنت بسمعها و أمر عليها مرور الكرام لأنى كنت شايف من إسمها إنها تافهه هى "ساح يا بداح"، دى متهيألى اول اغنيه كتبتها لمنير "كوثر مصطفى". و فى يوم من الأيام، مش عارف ليه، لقيت نفسى بسمع الأغنيه دى، و بركز فى كلماتها. و إتسمرت فى مكانى، لقيت فيه أغنيه مليانه بكلام، يمكن كان بقاله سنين محدش عبر عنه بالشكل ده. أغنيه ينفع تكون فعلا خلفيه للى حصل و بيحصل و لسه حيحصل فى مصر.

أنا حبيت أشاركم معايا فى سماع الأغنيه دى، بمناسبة الأيام السودا اللى إحنا فيها، كلمات الأغنيه بتقول:

ساح يا بداح، يا سؤال جرّاح
ما الذى كان’ و ما عدش و راح

قمر إنطفى، إنتفى، إختفى
نهر مبلّش حتى الريق

آه يا براح، عمال بيضيق
صبح و زيه الصبح التانى
ليل ملضوم فى الليل التانى
و أنا مش رايح، انا مش جاى
أنا مش واقف حتى مكانى

ساح يا بداح، يا سؤال جرّاح

إيه اللى إتكسر، فص اللولى ولا المرمر
طول العمر العسكر، عسكر
بس الناس، الناس كانت ناس
و كان الحلم قبالى براح



فعلا يا جماعه، طول العمر العسكر عسكر، بس الناس يمكن ما بقتش ناس.

ملحوظه: الأغنيه حتاخد وقت علشان تحمل

Monday, March 26, 2007

حظك اليوم


و الله العظيم، مصر دى بلد مسخره.
ده "حظك اليوم" فى جريده من جرايد مصر النهارده.
و بصراحه أنا مش قادر أعلق.

كلاكيت تانى قصيده

انا حطيت قصيده للشاعره دى قبل كده، و دى قصيده تانى ليها. أنا لسه مش عارف إسمها إيه لغاية دلوقتى بس
الست دى جامده قوى

Thursday, March 22, 2007

أغلى حاجه فى حياتى

أكتر حاجه صعبه فى الدنيا، إن الإنسان دايما بتكون حياته مليانه بحاجات كتير صُغيره. الحاجات دى بتبقى مهمه قوى فى حياته، و هو
مش حاسس بيها لأنها دايما فى وشه. اول مابيخسرها او ماتبقاش موجوده معاه بيحس قد إيه الحاجات دى كانت مهمه فى حياته.
أنا يمكن معرفتش أهمية أمى فى حياتى ، إلا بعد ما والدى إتوفى. فجأه، لقيت أهم واحد و أغلى واحد فى حياتى مش موجود. رحل فجأه من غير كلمة وداع، من غير ما يعرف هوه إيه بالنسبه ليا ، و بعد وفاته إكتشفت إنه مش بالنسبه ليا بس، ده بالنسبه لناس كتير تانيين.
من اللحظه دى، و أنا بقيت ببص لوالدتى بشكل تانى. كتير كنت بزعل معاها علشان حاجات تافهه، عادى يعنى شغل عيال. لكن من ساعة وفاة والدى، و أنا خايف. ساعات مش بعرف انام من كتر الخوف. خايف من لحظة الفراق اللى حاستها يوم وفاة والدى إنى أحسها تانى. خايف أنها ماتكنش عارفه هى قد إيه مهمه بالنسبه ليا، خايف تعدى لحظه ماتكونش معايا فيها، و اندم عليها بعد كده.
أنا إكتشفت إنى عمرى ما اخدت والدى بالحضن. عمرى ما بوست إيده. عمرى ما أقلتله أنا بحبك. يمكن دى كانت طبيعته، و يمكن دى طبيعتى انا برده، بس الحاجات دى كلها انا ندمان إنى معملتهاش. دلوقتى يمكن متعديش فرصه إلا و أبوس إيد أمى، بخدها بالحضن، بأقولها قد إيه بحبها، بس مش قادر أقولها قد إيه الخوف من بكره بقى عايش جوايا.
نصيحه منى، حاول دايما تبين حبك للناس اللى بتحبهم. متفوتش لحظه ممكن تكون فيها جنبهم.
يمكن تكون دى حاجات بسيطه، لكن بجد مش هتعرف قيمتها إلا لو الناس دى بعدت عنك.
أوعى تخبى اللى فى قلبك ناحية أى حد، والدك، والدتك، حبيبتك
الحياة دى أصغر كتير مما تتخيل.
كل سنه و إنتى طيبه يا أمى.
بحبك يا أغلى حاجه فى حياتى.

Friday, March 16, 2007

مظاهره تدوينيه

الاغنيه اللى شغاله دى بناءا على طلب "نوارة" "مدونه جبهة التهييس الشعبيه" ردا على القبض غلى المتظاهرين فى ميدان التحرير يوم 15 مارس 2007

كلمات الأغنيه (مصدرها نوارة)

يا قبضتي دقي على الجدار
لحد ليلنا ما يتولد له نهار
يا قبضتي دقي على الحجر
لحد ما تصحي جميع البشر
مش فاهم اللي حاصل لكن بقلبي واصل
واللي مش فاهمه عقلي بتشرحه السلاسل
يا قلوب بتنزف دم في العتمة
يا قلوب بتنزف دم وتغني
سجنوكي والكلمة غصبن عنها وعني
طلعت من القضبان وم الاسوار

Thursday, March 15, 2007

رجل شريف فى وطن قلّ فيه الشرفاء

إفتكروا الإسم ده كويس "طاهر حزين"، حتسمعوه كتير الفتره اللى جايه، أو يمكن حيختفى و يرجع بعد فتره. المهم مين هوه "طاهر حزين"؟

" طاهر حزين" هو عضو مجلس شعب عن دائرة إسنا، محافظة قنا. طبعا إحنا عارفين إن محافظة قنا دى يعنى عبارة عن عصبيات و قبليات، يعنى الراجل ده وراه ناس بالشوم و العصى، يمكن علشان كده مبيخفش. الراجل ده إترشح مستقل ، و بعد ما نجح بإكتساح إنضم للحزب الوطنى، و شكله كده إنضم غصب عنه، ليه بقول كده، لأن الراجل ده من ساعت ما إنضم للحزب الوطنى و هو ماشى عكس اللى هما عايزينه.

المهم الراجل ده عمل إيه من ساعتها؟
  1. رفض مد العمل بقانون الطوارئ، و كان النائب الوحيد فى الحزب الوطنى اللى رفضه
  2. إنضم للقضاة فى مطالبهم أيام مشكله نادى القضاه و اعلنها فى مجلس الشعب
  3. أبدى إعتراضه و رفضه لقانون جرائم النشر ، و طالب بأخذ رأى المختصين اللى هما الصحفيين، و ده أعتقد كان طلب المعارضه برده
  4. أبدى رفضه لقانون الإرهاب و أوضح أن العمل بقلنون الطوارئ الحالى أفضل من قانون الإرهاب الذى سيقيد حرية المواطن
  5. قدم إستجوابين فى مجلس الشعب ، و ده كان أول مره عضو فى الحزب الوطنى يقدم إستجواب يا جماعة من تلاتين سنه
  6. طبعا علشلن العمله السودا اللى هوه عملهل دي، قرر الحزب الوطنى تجميد عضويته لعدم إلتزامه الحزبى، لكن الراجل أصر برده على الإستجوابين

اللى مستغربله، إن الراجل ده عمل كل الكلام ده من غير طنطنه ولا زفه ولا أى حاجه خالص... تفتكروا لسه فيه ناس فعلا شريفه فى مصر؟

أيو، فيه ناس فعلا شريفه، و "طاهر حزين" واحد منهم، و كتير غيره موجودين بس إحنا مش شايفينهم لأن مصر للأسف يا جماعه بقى وطن طارد للشرفاء.

فتحية لك أيها الرجل الشريف، فى و طن قلّ فيه الشرفاء

Tuesday, March 13, 2007

مفيش حاجه

this video was sent to me by email, long time ago. I don't know, i just feel i want to post it here, it says a lot.

I don't know the poet or where she said it, but i really like it. Enjoy it :-)

مصر يا بلد العجايب


مصر دى بلد عجيبه قوى! ماشيه بقوة "الدفع الذاتى"، مش عارف بقى قوة الدفع دى خدتها من ايام الفراعنه، ولا من إمتى بالظبط؟ مش عارف ،المهم إنها ماشيه بيها لغاية دلوقتى، و ماشيه بيها فى كل حاجه فى الدنيا

كنت مره مسافر بره (معزوم طبعا، هو انا حيلتى حاجه)، المهم أكتر حاجه إستغربتلها بقى الناس و هيه بتعدى الشارع، مفيش إشارات ولا حاجه، و طبعا بما إنى مصرى بقى و مسافر يبقى لازم أدى صورة حلوة عن المصريين، كنت بقف و استنى العربيات تعدى أو بقى لو الراجل ذوق يعنى نفضل نعزم على بعض لغاية محد فينا يزهق... لغاية ما صحابى قلولى إن اللى انا بعمله ده غلط، إزاى؟!! أداب المرور عندهم أن فى الحته بتاعة عبور المشاة، لو فيه واحد ماشى عايز يعدى العربيه تقف، من غير إشارة ولا يحزنون. يعنى كل واحد بيحترم حقوق التانى ببساطه

هنا بقى فى مصر تلاقى الواحد بينزل من بيتهم و هو فعلا مش ضامن يرجع تانى. يعنى لو معاك عربيه و راكبها، لازم تكون إتمرنت هلى عربيات الملاهى قبل كده, و بعدين الواحد ميفتكرش نفسه إنه كده خلاص بقى فى الأمان، ما هو المشكله مش فيك، المشكله بقى إن الناس اللى حوليك و راكبين عربياتهم إتمرنوا زيك على عربيات الملاهى؟

و لو بقى الواحد كان من انصار المشى (بمزاجه أو غصب عنه يعنى) لازم لياقته البدنيه تكون عاليه قوى، علشان النط بقى اللى حيعمله علشان يتفادى كل اللى طاير فى الطريق ده، مع إننا لو مشينا على الرصيف الحياة حتكون أسهل كتير. و على فكرة، المشكله مش مشكلة إن مفيش رصيف فى شوارع مصر، لأ، الناس هى اللى يتحب تمشى جنب العربيات، مش عارف بقى يمكن الناس بتحب الونسه

مصر دى بلد عجيبه، لسه عايشه رغم إن ناسها أول حاجه بيفكروا فيها إزاى ياكلوا حق بعد. مصر دى بلد عجيبه، لسه عايشه و ناسها مش بتحترم حقوق بعض. مصر دى بلد عجيبه، لسه عايشه، مع إنها بتتنهب كل يوم من مليون واحد

مش فعلا مصر دى بلد عجيبه، لسه مستحمله ناسها مع إنهم هم اللى مبهدلينها

Friday, March 09, 2007




What can be my first blog?! Well, i am not used
on writing my thoughts, i did it few times before,
but i can't say this is a habit. So, i kept on thinking
for a while & i didn't find better than this song to
introduce my thoughts. It's "Imagine" by John Lennon.


Imagine there's no Heaven
It's easy if you try
No hell below us
Above us only sky
Imagine all the people Living for today

Imagine there's no countries
It isn't hard to do
Nothing to kill or die for
And no religion too
Imagine all the people
Living life in peace

You may say that I'm a dreamer
But I'm not the only one
I hope someday you'll join us
And the world will be as one

Imagine no possessions
I wonder if you can
No need for greed or hunger
A brotherhood of man
Imagine all the people
Sharing all the world

You may say that I'm a dreamer
But I'm not the only one
I hope someday you'll join us
And the world will live is one



In this world, where power & money seem
to be the only thing to fight for. In this world,
where billions of people die of povrety, i think
it's better to be a dreamer & i am sure, i am not
the only one.




Photo from BBC.co.uk