أكتر حاجه صعبه فى الدنيا، إن الإنسان دايما بتكون حياته مليانه بحاجات كتير صُغيره. الحاجات دى بتبقى مهمه قوى فى حياته، و هو
مش حاسس بيها لأنها دايما فى وشه. اول مابيخسرها او ماتبقاش موجوده معاه بيحس قد إيه الحاجات دى كانت مهمه فى حياته.
أنا يمكن معرفتش أهمية أمى فى حياتى ، إلا بعد ما والدى إتوفى. فجأه، لقيت أهم واحد و أغلى واحد فى حياتى مش موجود. رحل فجأه من غير كلمة وداع، من غير ما يعرف هوه إيه بالنسبه ليا ، و بعد وفاته إكتشفت إنه مش بالنسبه ليا بس، ده بالنسبه لناس كتير تانيين.
من اللحظه دى، و أنا بقيت ببص لوالدتى بشكل تانى. كتير كنت بزعل معاها علشان حاجات تافهه، عادى يعنى شغل عيال. لكن من ساعة وفاة والدى، و أنا خايف. ساعات مش بعرف انام من كتر الخوف. خايف من لحظة الفراق اللى حاستها يوم وفاة والدى إنى أحسها تانى. خايف أنها ماتكنش عارفه هى قد إيه مهمه بالنسبه ليا، خايف تعدى لحظه ماتكونش معايا فيها، و اندم عليها بعد كده.
أنا إكتشفت إنى عمرى ما اخدت والدى بالحضن. عمرى ما بوست إيده. عمرى ما أقلتله أنا بحبك. يمكن دى كانت طبيعته، و يمكن دى طبيعتى انا برده، بس الحاجات دى كلها انا ندمان إنى معملتهاش. دلوقتى يمكن متعديش فرصه إلا و أبوس إيد أمى، بخدها بالحضن، بأقولها قد إيه بحبها، بس مش قادر أقولها قد إيه الخوف من بكره بقى عايش جوايا.
نصيحه منى، حاول دايما تبين حبك للناس اللى بتحبهم. متفوتش لحظه ممكن تكون فيها جنبهم.
يمكن تكون دى حاجات بسيطه، لكن بجد مش هتعرف قيمتها إلا لو الناس دى بعدت عنك.
أوعى تخبى اللى فى قلبك ناحية أى حد، والدك، والدتك، حبيبتك
الحياة دى أصغر كتير مما تتخيل.
كل سنه و إنتى طيبه يا أمى.
بحبك يا أغلى حاجه فى حياتى.
13 comments:
احنا دايما مش بنحس بالحاجات الجميلة اللي في حياتنا غير اما تروح ممنا
بس اعتقد ان دي طبعتنا
حتي اهلنا الناس اللي بنحبهم بجد وهما كمان بنتعود علي حبهم لدرجه اننا بعد كده مش بنحسه وكمان مش بنعبر عنه
طبيعتنا كده ولا احنا اللي بنعمل كده في نفسنا
في تفاصيل صغيره اوي في حياتنا لو اخدنا بالنا منها اكيد حياتنا هتتغير وتبقي احسن
أنا حبيت أفكر أى حد يقرا البوست ده، إنه مينساش يفكر دايما فى الناس و الحاجات اللى حوليه، لانه مش عارف الناس و الحاجات دى حيفضلوا حوليه لغاية إمتى.
المطلوب إن إحنا نفتكر على الاقل من فتره لفتره.
عندن حق موفقاك جداااااا حاجات مش بنحس بقيمتها الا ما بنفقدها
و نسينا ان العمر لحظة
كل سنه و كل امهاتنا طيبين و ربنا يخليهم لينا
رانيا:
يمكن لو إبتدينا نحس بالحاجات المهمه اللى فى حياتنا، نبتدى نصحى الكائن اللى مات عندنا ده اللى كان إسمه "الإحساس"
موضوع رائع جدا يا بيليفير والواحد مابيعرفش قيمة الحاجه غير اما يفتقدها
تحياتي
ليه دايماإحساسنا بالمفقود أكبر من إحساسنا بالموجود؟
دى طبيعة البشر ، ولا دى الدنيا اللى غيرت طباع البشر.
تحياتى لك يا إبن ناصر
جميل جدا
فعلا أحنا لا نشعر بقيمة الاشياء الا عندما نفقدها تحياتي لك ولمدونتك الجميله
ROMIL
شكرا يا روميل. انا لسه يقول يا هادى أهوه.
فعلا..من الصعب جدا ادراك قيمه الشيء الا بعد فقدانه
كل سنه و كل امهات مصر بخير
that's so tuoching
انا بقي عمري ما قلت للناس اللي بحبهماني بحبهم ممكن تكون مشكلة في كيفية التعبير عن النفس لكن اعتقد انهم بيبقوا حاسين اني بحبهم من تصرفاتي معاهم
اما الست مامتي
فهي عندها احساس انى انا اللي مامتها
مش العكس ودا بيسعدني جدا
هي صحيح بتمر طول الوقت بأزمات صحية صعبة لكن انا لسه معنديش احساس بالخوف
احتمال لاني مش متخيلة فكرة اختفائها من حياتي
انت برج سرطان مش كدة؟
مممممممممم
زنزانه:
ده انا أعتبر اليوم ده عيد بقى عندى هنا.
المشكله إن إحنا دياما حاسين إن الناس اللى بنحبهم، حاسين بحبنا ليهم، و إن مش لازم نقولهم علشان يحسوا بكده.
بس صدقينى، إنك توضحى حبكم ليهم، سواءا بالفعل او بالكلام، ده أهم ميت مره من الإحساس.
أنا إحساسى بالخوف نابع من تجربه، يمكن علشان كده هو إحساس كبير شويه.
و بعدين، أيوه أنا برج السرطان، و بلاش كلمه "إخيييييي" اللى كل مره أسمعها بعد ما الناس تعرف إنى من البرج الفقرى ده.
:)
يا لهوييييييييي
انت مصر على فكرة البتاع البطيخي برده
المهم
بالنسبة لبرج السرطان بالعكس
جدا بالنسبة لي افضل خبرة ف حياتى كلها كانت مع ناس برج سرطان سواء رجالة او ستات وانا من اكتر المشجعين له
بس بشكل عام انا لا اعتقد ف حظك اليوم ولا الكلام الاهبل دا لكن بحاول فهم مدى توافق اصحاب الابراج مع صفاتها سلام
Zenzana:
انا مليش فى الأبراج خالص. بس انا زيك كده بحب أقرا و أقعد أقارن كده و أشوف مدى توافق الكلام ده مع الناس.
بس الغريب فعلا، إن ساعات بلاقى فيه شوية حاجات مشتركه و فعلا بتكون بتميز الناس بتوع البرج الواحد.
Post a Comment