مصر يا بلد العجايب

مصر دى بلد عجيبه قوى! ماشيه بقوة "الدفع الذاتى"، مش عارف بقى قوة الدفع دى خدتها من ايام الفراعنه، ولا من إمتى بالظبط؟ مش عارف ،المهم إنها ماشيه بيها لغاية دلوقتى، و ماشيه بيها فى كل حاجه فى الدنيا

كنت مره مسافر بره (معزوم طبعا، هو انا حيلتى حاجه)، المهم أكتر حاجه إستغربتلها بقى الناس و هيه بتعدى الشارع، مفيش إشارات ولا حاجه، و طبعا بما إنى مصرى بقى و مسافر يبقى لازم أدى صورة حلوة عن المصريين، كنت بقف و استنى العربيات تعدى أو بقى لو الراجل ذوق يعنى نفضل نعزم على بعض لغاية محد فينا يزهق... لغاية ما صحابى قلولى إن اللى انا بعمله ده غلط، إزاى؟!! أداب المرور عندهم أن فى الحته بتاعة عبور المشاة، لو فيه واحد ماشى عايز يعدى العربيه تقف، من غير إشارة ولا يحزنون. يعنى كل واحد بيحترم حقوق التانى ببساطه

هنا بقى فى مصر تلاقى الواحد بينزل من بيتهم و هو فعلا مش ضامن يرجع تانى. يعنى لو معاك عربيه و راكبها، لازم تكون إتمرنت هلى عربيات الملاهى قبل كده, و بعدين الواحد ميفتكرش نفسه إنه كده خلاص بقى فى الأمان، ما هو المشكله مش فيك، المشكله بقى إن الناس اللى حوليك و راكبين عربياتهم إتمرنوا زيك على عربيات الملاهى؟

و لو بقى الواحد كان من انصار المشى (بمزاجه أو غصب عنه يعنى) لازم لياقته البدنيه تكون عاليه قوى، علشان النط بقى اللى حيعمله علشان يتفادى كل اللى طاير فى الطريق ده، مع إننا لو مشينا على الرصيف الحياة حتكون أسهل كتير. و على فكرة، المشكله مش مشكلة إن مفيش رصيف فى شوارع مصر، لأ، الناس هى اللى يتحب تمشى جنب العربيات، مش عارف بقى يمكن الناس بتحب الونسه

مصر دى بلد عجيبه، لسه عايشه رغم إن ناسها أول حاجه بيفكروا فيها إزاى ياكلوا حق بعد. مصر دى بلد عجيبه، لسه عايشه و ناسها مش بتحترم حقوق بعض. مصر دى بلد عجيبه، لسه عايشه، مع إنها بتتنهب كل يوم من مليون واحد

مش فعلا مصر دى بلد عجيبه، لسه مستحمله ناسها مع إنهم هم اللى مبهدلينها